Croeso i’r Morlan –

canolfan ffydd a diwylliant

Canolfan yw Morlan sydd â’r nod o hybu bywyd cymunedol – yn ddiwylliannol ac yn ysbrydol, yn lleol a thu hwnt. Fe’i sefydlwyd yn Ebrill 2005 i greu pont rhwng yr eglwys a'r gymdeithas o'i chwmpas ac mae wedi datblygu yn ganolfan bwysig yn yr ardal.

Ond mae Morlan yn llawer mwy nag adeilad ...

... mae'n fan cyfarfod – i greu a thrafod, i berfformio, i ddysgu, i ysgogi a chalonogi, i gyd-ddeall a chlosio, i rannu a chyfrannu – tir canol rhwng yr eglwys a phawb sy'n byw yn ein cymdeithas amlddiwylliannol.

Gellir llogi amryw ystafelloedd Morlan – sy'n cynnwys neuadd fawr – ar gyfer pob math o ddigwyddiadau a gweithgareddau, ac mae ganddi’r cyfleusterau ar gyfer perfformiadau cerddorol a theatrig. 

Mae’n ganolfan brysur! Cynhelir cyfarfodydd gweddi, dosbarthiadau Cymraeg, dosbarthiadau dawns a dosbarthiadau darllen gwefusau yma bob wythnos, ac mae nifer o grwpiau lleol yn ystyried Morlan fel eu ‘cartref’ ac yn cynnal cyfarfodydd rheolaidd yma. I bobl ifanc ceir clwb ieuenctid – Clwb Clex – sy'n cyfarfod yma’n wythnosol yn ystod y tymor ysgol o Fedi i Fai.

Yn ogystal, mae Morlan yn cynnal ei rhaglen ei hun o ddigwyddiadau a gweithgareddau trwy gydol y flwyddyn – arddangosfeydd celf, dramâu, cyngherddau, nosweithiau llenyddol, digwyddiadau cymdeithasol a thrafodaethau ynghyd â gweithgareddau blynyddol megis Darlith Flynyddol a Gŵyl Lyfrau. Mae'r holl weithgarwch yn ymdrin ag ystod eang o bynciau – rhai cymdeithasol, gwleidyddol, crefyddol a diwylliannol, ac mae rhai yn tynnu sylw at faterion megis Diwrnod Cofio'r Holocost neu Wythnos Un Byd.

Ers cyn ei sefydlu, grŵp o wirfoddolwyr brwdfrydig ac ymroddgar bu'n gyfrifol am Morlan, ac maent yn parhau'n bwysig i'r ganolfan er bod ganddi Reolwr llawn amser ers Mai 2008. Mae'r cyfeiriad ebost yn cael ei warchod rhag spam bots, rhaid i chi alluogi Javascript i'w weld. os am wybod mwy am sut i ymuno â'r tîm o wirfoddolwyr; ceir cyfleoedd i gynorthwyo yn y Bar Coffi, yn yr ardd neu trwy gynnal a chadw'r adeilad.