CYDNABYDDIAETH I UN O WIRFODDOLWYR Y MORLAN

Mae Wythnos Gwirfoddolwyr (1-7 Mehefin 2010) yn ddigwyddiad blynyddol a gynhelir ar draws y DU i ddathlu’r cyfraniad gwych y mae miliynau o wirfoddolwyr yn ei wneud. Ar 7 Mehefin, roedd CAVO – y corff ymbarél ar gyfer mudiadau gwirfoddol yng Ngheredigion – yn cynnal Seremoni Gwobrwyo i gydnabod y gwaith da a wneir gan wirfoddolwyr ar draws y sir.

Yr oedd Alun Morris, sy’n gwneud gwaith gwirfoddol diflino yn y Morlan, wedi’i enwebu ar gyfer gwobr gyda CAVO. Er na enillodd y brif wobr, cafodd ei gyflwyno gyda thystysgrif o gydnabyddiaeth yn ystod y seremoni. Yn y llun, fe’i gwelir gyda’r gwirfoddolwyr eraill a enwebwyd o Geredigion.

Yr oedd Alun hefyd wedi’i enwebu ar gyfer gwobr debyg gyda’r WCVA – Cyngor Gweithredu Gwirfoddol Cymru. Derbyniodd gymeradwyaeth uchel am ei waith ac fe’i cyflwynwyd â thystysgrif o gydnabyddiaeth gan Rhodri Jones o WCVA. 

Derbyniodd dau berson arall o Geredigion gydnabyddiaeth debyg ac fe'i gwelir yn y llun gydag Alun Morris (ail o'r chwith) a Rhodri Jones (chwith). Yn y llun hefyd y mae'r Cynghorydd Haydn Lewis (canol) a Rik Mowbray, CAVO (dde pellaf).

---------------------------------------------------------------------------------------------------------------------   

Theatr Hijinx yn cyflwyno

Into My Own

drama gan Glenys Evans

Prynhawn Iau, 19 Mai (am 2.30), roedd Canolfan Morlan yn croesawu Theatr Hijinx yn ôl gyda’u cynhyrchiad o ddrama gan Glenys Evans Into My Own. 

Cwmni teithio graddfa fach yw Theatr Hijinx – un o brif rai'r DU, gyda dros 27 mlynedd o brofiad mewn cynhyrchu theatr ar gyfer pobl ag anawsterau dysgu a’u cymunedau. Mae’r cwmni’n cynnig gwefr theatr fyw, gan roi bywyd i gymeriadau, themâu a materion sy’n berthnasol, yn heriol ac yn llawn ysbrydoliaeth.

Yn y ddrama ysbrydoledig hon, sy’n ymwneud â chyd-ddibyniaeth, torri cysylltiadau a symud ymlaen, mae Cyfarwyddwyr Artistig Hijinx, Gaynor Loughor yn cyfarwyddo cast o bedwar gyda cherddoriaeth gan James Williams. 

Bu Hijinx â’r ddrama ar daith am y tro cyntaf yn 2004, ac fe gafodd adolygiadau arbennig, ac ni chafodd y rhai a'i gwelodd yn y Morlan eu siomi chwaith:

“Never a company to shirk a difficult sublject, Hijinx has excelled itself ... Not only does it tackle the themes of adults with learning disabilities, but it does so constructively, putting across messages to all involved – parents, relations, friends, co-workers, the wider public and indeed to the very people with such disabilities.” (The Stage). 

“... has that Hijinx hallmark: the lump in the throat and the tear in the eye that always come just before the final scene, even with this hardened and demanding old critic.” (Western Mail)

DARLITH FLYNYDDOL MORLAN 2010

Crefydd a Gwleidyddiaeth 

Y Parchedicaf Ddoctor Barry Morgan, Archesgob Cymru

Yn y cyntaf o Ddarlithoedd Blynyddol y Morlan, a draddodwyd ar ben-blwydd y ganolfan yn 5 oed, mae Archesgob Cymru yn cyflwyno ei ddadl bod modd cyfuno crefydd a gwleidyddiaeth.

Copïau ar werth o swyddfa Morlan am £3 yr un (+ 50c cludiant). Mae'r cyfeiriad ebost yn cael ei warchod rhag spam bots, rhaid i chi alluogi Javascript i'w weld. os am archebu copi.

DATHLU'R PUMP! 

Penwythnos i nodi pumed pen-blwydd y Morlan 

Roedd 23 Ebrill 2010 yn nodi 5 mlynedd ers agor yn swyddogol canolfan Morlan ar ei newydd wedd.

Gallwch ddarllen am sut a pham yr sefydlwyd y Morlan yn adrannau eraill y wefan hon, ond y mae’r Morlan yn bodoli heddiw oherwydd gweledigaeth a dyfalbarhad criw o bobl ymroddedig o Gapel y Morfa sydd berchen yr adeilad. 

Cyn agor y Morlan, bu trafod mawr ar y math o ganolfan yr oedd angen ei sefydlu yn Aberystwyth a beth fyddai prif gyfeiriad y ganolfan honno. Ystyriwyd ei disgrifio fel canolfan cyfiawnder a heddwch, canolfan ieuenctid neu ganolfan gymdeithasol ond, yn y diwedd, cytunwyd ar ganolfan ffydd a diwylliant fyddai’n gweithredu fel pont rhwng yr eglwys a’r gymdeithas o'i chwmpas gan hybu bywyd cymunedol – yn ddiwylliannol ac ysbrydol, yn lleol a thu hwnt.

Mae blynyddoedd cyntaf y Morlan a’r math o weithgarwch sydd wedi digwydd yno dros y cyfnod hwn yn profi y gwnaethpwyd y dewis iawn. Ers ei hagor, mae Morlan wedi tyfu a datblygu i fod yn ganolfan prysur a phwysig, yn adnodd gwerthfawr i’r dref, sy’n cael ei defnyddio gan drawstoriad o fudiadau a grwpiau lleol a chenedlaethol ar gyfer amrediad eang o weithgareddau.  

Mewn gwirionedd, mae'r Morlan yn golygu rhywbeth gwahanol i bawb, a dyma sy’n gwneud y lle mor unigryw ac mor arbennig mae'n siwr. I rai mae’n ganolfan gymunedol, lle i fynychu eu dosbarth Cymraeg neu gyfarfod misol neu wythnosol eu grŵp arbennig. I eraill mae’n fan i gynnal trafodaeth a gweithgarwch ar faterion cymdeithasol ac yn cael ei defnyddio i’r pwrpas hwn gan fudiadau megis y Rhwydwaith Heddwch a Chyfiawnder, Cyfeillion y Ddaear, Ymgyrch Cefnogi Palesteina a PACT. Mae hefyd yn cynnig llwyfan a gofod i weithgarwch celfyddydol gan groesawu cwmnïau drama o’r Brifysgol a chwmnïau megis Cwmni Hijinx, Theatr Powys a Chwmni Cydweithredol Troed-y-Rhiw, yn ogystal â cherddorion ac arlunwyr o bob math.

Ac wrth gwrs mae gan Morlan ei rhaglen ei hun  o weithgareddau dros y flwyddyn – trafodaethau, nosweithiau barddoniaeth, arddangosfeydd celf, dramâu a chyngherddau, i enwi ond rhai. Mae nifer o’r rhain yn ymwneud â materion heddwch a chyfiawnder, hawliau dynol a materion ffydd, sy’n cyd-fynd â nod gwreiddiol y ganolfan fel canolfan ffydd a diwylliant. Trefnir rhai o’r digwyddiadau hyn ar y cyd â grwpiau neu fudiadau eraill, ac mae sefydlu partneriaethau o’r fath yn bwysig iawn i’r Morlan, gan ddod â’r ganolfan i’r gymuned a’r gymuned i’r ganolfan.

Dros y penwythnos 23-25 Ebrill, trefnodd Morlan gŵyl Dathlu’r Pump! i nodi ei phen-blwydd yn 5 oed. 

Cychwynnwyd y dathliadau gydag arddangosfa gelf gan Brosiect Celf Plas Lluest yn dwyn y teitl ‘Dathlu’, ac yn cynnwys amrywiaeth o ddarnau, pob un yn dangos agweddau a dehongliadau o ddathlu. Agorwyd yr arddangosfa’n swyddogol ar nos Sadwrn yr ŵyl pan ymunodd cefnogwyr a chyfeillion y Morlan a Phlas Lluest mewn twmpath dawns dan ofal Parti Dawns Aberystwyth. 

Y noson flaenorol (23 Ebrill), cynhaliwyd darlith flynyddol gynta’r Morlan. Y Parchedicaf Ddoctor, Barry Morgan, Archesgob Cymru, gafodd y fraint o draddodi’r ddarlith gyntaf honno ar y thema Gwleidyddiaeth a Chrefydd, ac mae copïau dwyieithog o'r ddarlith ar werth o'r Mae'r cyfeiriad ebost yn cael ei warchod rhag spam bots, rhaid i chi alluogi Javascript i'w weld. (£3 + 50c cludiant).  

Ar y dydd Sadwrn, roedd cynhadledd wedi’i threfnu gan y Morlan, Cristnogaeth 21 ac Adran Ddiwinyddol Cymorth Cristnogol er mwyn darparu cyfle i drafod yr her sy’n wynebu Cristnogaeth gyfoes. Y prif siaradwr oedd yr Athro Keith Ward (awdur Re-thinking Christianity a The Challenge of Fundamentalism), ond cafwyd cyfraniadau gan eraill hefyd ynghyd â grwpiau trafod amrywiol. 

Parhawyd â’r dathliadau ar y dydd Sul gyda Gwasanaeth Dathlu yng Nghapel y Morfa dan ofal Parchedig Eifion Roberts, gyda'r dathlu'n dirwyn i ben yn y prynhawn gyda sioe Martyn Geraint – awr o hwyl a chanu gydag un o ffefrynnau’r plant.